Актанышның нәни кыйпылчыгы,

Актанышның нәни кыйпылчыгы,
Туган авыл - ИскеБалтачым.
Кайтып киләм сагынып авылга,
Канатларым арып талчыккач.

Кызыл балчык, комлы, таулы яклар,
Якын иткән безнең бабайлар.
Бер ягыннан Шәбез елга ага,
Икенче як - басу, яланнар, 

Иркен яланнарда утлап йөрде,
Яшь бозаулар, атлар көтүе.
Кирпич завод гөрләп эшләп торды,
Бәхет иде эшле булуы.

Халкы тырыш, техника тавышы,
Гөрләп эшли басу-кырларда.
Язын көзен әткәм сабан сөрде,
Ал таңнарда, кара төннәр дә.

Юлы такыр, Ишәл тавы аша,
Менеп төшеп күпме үтелгән.
Кулны артка куеп олыларча,
Адымнарны санап йөрелгән.

Балачаклар, үсмер чакларым да,
Синдә үтте ИскеБалтачым.
Мәктәп тауларында уйнап йөрдек,
Тау өсләре кардан ачылгач.

Шәбез елгабызның күперендә,
Туктап торып бераз хәл алыш.
Колагыма шуннан ишетелә,
Челтер чыңлы көлгән бер тавыш.

Олы кое буен урап кайтам,
Үлән баскан, юк шул сукмагы.
Әткәй эчә иде әйрән ясап,
Салкынлыгы - тешне сындыра.

Тукмай буйлары үзе бер тарих,
Бәп бәләкәй инеш, тар гына.
Күрсәтеп тә куяр иде холкын,
Көч дәрманын ташу киткәндә.

Моңлы хисләр били күңелләрне,
Язлар җиткәч күңел нечкәрә.
Гармун моңнарына күмелгәндәй,
Тынып калган авыл кичләре.